نووروز داعواسی

نووروز داعواسی

بؤلگه نین مرکز کندی "نادارلی" ایدی. یازین اورتالاریندا مرکزدن ساوالانا خبر یئتیشمیشدی، هر کیم دهبان(کتخودا) اولماق ایسته ییر، 10 گونه جن نادارلییا گلسین. اوندان علاوه کندده بتر جار دوشموشدو، هامینین حتی قادینلاریندا سیجیللیسی اولمالیدیر. بللی ایدی، دؤولت سیجیللی وئرنده کتخودا گره ک یاخین ایش بیرلیگی آپاراردی. بو دورومدا، کند آغ ساققالاری اؤزلرینی کتخودالیغا صلاحییتلی بیلسه لرده، سیجیللی قونوسوندان چکینه رک مرکزه گئتمکه قرار وئره بیلمه دیلر. 10 گونلوک فورصت قورتولماقدایدی کی، رحیملی طایفاسیندان اولان صالاح اوغلو نووروزون نادارلییا گئتمه سینین گؤزلنیلمز خبری، کوچه ده-باجادا یاییلدی. صالاح اوغلو نووروز(نووروزعلی) شستلی بیر کیشی ایدی و هامی اوندان حئساب آپاراردی. 42 یاشلی کیشی بوتون مجلسلرده سئچیلن آداملارین بیریسی ایدی و ائله لاپ اوشاقلیقدان آغ ساققال تکین داوراناردی. هر حالدا، نووروز اونونجو گون سحر تئزدن آتینی یهرله ییب میندی و نادارلییا دوغرو چاپدیردی. ناهارا یاخین مرکزه یئتیشیب اورادا اؤزونو تانیتدیردی. ناهاردان سونرادا کتخودالیق حؤکمونو آلیب دهبان اولاراق یوردونا دؤندو. نووروز، او گوندن بو یانا بوتون مجلسلرده یوخاری باشدا ایله شدی. کتخودالیق مؤهرونوده پیتیکلره باسدی.