سنده صوفیاندان گلمیسن؟!

سنده صوفیاندان گلمیسن؟!

کندین آشاغی کوچه لرینین بیرینده، کاسیب ار-آرواد، نشتابلیق یئدیکدن سونرا، کورسو باشیندا اوتورموشدولار. رجب کورسونون بؤیوک یوخاری توووندا، صدفده کیچیک یان توودا ایلشمیشدی. اونلار، اوشاقلاریندان و چیلله نین شاختاسیندان دانیشیردیلار. آلتمیش یاشلی کیشی و اللی بئش یاشلی آروادین اوغلانلارینین دؤردوده ائولی ایدیلر و قیزلارینین اوچوده ار گئتمیشدیلر. دئمک، او ائوده ایندی ار-آرواد ایکیسی یاشاییردی. بیر دانادا اونلارلا بیرگه یئییب-یاتان پیشیکلری وار ایدی. آغیمتیل، یئکه ارکک پیشیک، او چاغدا آشاغی توودا اوزانیب اؤزونو ایستییه وئرمیشدی. رجب اوتوردوغو یئرده بیر آز سالیب چیخیب دئدی: "آرواد، قار سحری دای گئجه کی تکین یاغمیر. من دوروم گئدیم صوفیانا! بلکه اوردا بوگون ایشه آپاران اولدو!" صدف کدرلنیب جوابلادی: "آی کیشی بوگون صوفیاندا سنی کیم ایشه آپاراجاق؟! دونن تربیزدن الی بوش قاییددین، بو شاختادا نه ایشی اولاجاق صوفیاندا!؟" کیشی دئدی: "گئدیم بلکه بئش-اون تومن قازاندیم! جیبیمده فقط ایکی دانا بئش تومنلیک وار! هر نه ایش اولسا گؤره رم. قار کوره مگه ده آپارسالار گئدرم!" آردیندان، خانیمین جوابینی گؤزله مه دن کورسودن ائشیگه چیخدی. گئچیب قالین ایپ جورابلارینی، اوست شالوارینی و کؤهنه پالتووونو گئیدی. بؤرکونوده باشینا قویدو. رجبین حاضیرلانماسینی حیسس ائدرکن، آشاغی توودا یاتان پیشیک، یئریندن دوراراق ماوولدایا-ماوولدایا یییه سینه دوغرو گلدی. سانکی اودا رجبین گئتمه سیندن تعجوبلنرک کدرلندی! او زاماندا، رجب همیشه کی کیمی پیشیکله ماراقلانیب حئیوانی ازدیره-ازدیره بیر آز دانیشدیردی. سونرا، دهلیزه چیخیب اورادان بوش بیر تلیس گؤتوره رک رئزین باشماقلارینی گیریب یولا دوشدو. ار گئتدیکده، صدف آیاغا دوروب یاشماغینی برکیدیب گونده کی ایشلریله مشغول اولدو. پیشیک ایسه ملول-ملول بایاقکی یئرینه دؤنوب اوتوراراق فیکیرلره گئتدی!