جیغاللیق

جیغاللیق

قوچعلی، قورخونج بیر یوخو گؤروردو. اوزاق چؤلده قویون اوتارماقدایدی کی، کندلیلری میرقاسیم نم-هارادان تاپیلدی!؟ آریق-کوله ساققالی سئیید، اوولده حیرصیله دیندن، ایماندان و کندلیلیکدن صؤحبت ائله دی. آردیندان، نم-نیه چؤللرده اونو قووالاماغا گؤتوردو!؟ ده ینگی بیر یاندا، بؤرکوده بیر یاندا قالدی. دیبده، قاچان قوچعلینی سوروسوندان خئیلک آرالیدا یاخالادی. هئیکللی کیشینین سینه سی اوستونه چیخیب خیتدکله دی و هده له یه- هده له یه سئیید مالیسینی ایسته دی! گوبود اللری یارارسیز قالان قوچعلی، گوجه نه-گوجه نه، "نمنه ایسته ییرسن اونو دئه؟!" دئیرکن، میرقاسیم جوابلادی: "قوچعلی، آغ قوچوو منه سئیید مالی وئر! آی موسلمان آخی، سن ایندییه جن منه دوز-عمللی بیر پای وئرمه ییبسن!؟" جوابیندا، قوچعلی وئردیکلرینی آلتدان بیر-بیر ساییب دلیل گتیردی. آنجاق ناراضی سئیید بوغازینی داهادا برکدن سیخدی و قوچعلی چوخ-چوخ چتین نفس آلا بیلدی. دورومو گئتدیکجه ده آغیرلاشدی. اینسانین روحو بدنیندن آیریلماقدا، بیردن هاراسان یوخودان آییلدی! کیشی گؤردوکلرینین یوخو اولدوغونو آنلادیقدا، آلله شیطانا لعنت ائله سین دئییب اوره گی یئرینه گلدی! بونونلا بئله، گئجه یاریسیندان سحره جن یاتانماییب یاتاغیندا وورنوخدو. بیر لحظه ده میرقاسیمین سؤزلرینی اونودا بیلمه دی. اؤزوندن دؤنه-دؤنه سوروشدو: "گؤره رسن موسلمانچیلیغیمدا من هانسی حارام ایشلر گؤرموشم!؟" آردینداندا سورغولارینا یانیت آختاردی. آتا-آناسینا بیر عؤمور قوللوق ائدیب، اؤلنده ده قوم شهرینه آپاریب قویلامیشدی. هابئله، کند ماللاسینین بویوردوقلارینین هامیسینا عمل ائتمیشدی. موسلمان کیشی، بونلارین توکنمز ثوابی اولان ایشلر اولدوغونا اوره کدن اینانیردی. باخمایاراق کی، اؤزونون بعضی یئرلرده آخساق اولدوغونو و پوخلو ایشلر گؤردوگونوده دریندن بیلیردی!