یاشاسین تراختور

تبریزین 1 تاخیمی 7 ایل آشاغی لیگده قالدیقدان سونرا، 89-1388فصلینده یئنیدن ایرانین سوپئرلیگینه یوکسلدی. تراختور بو سفر تورک کیملییی سیمگه سینه چئوریلیب، یولداشلار قازانیب دوشمنلرده تاپدی. تراختورون تبریزده کی هر اویونوندا، چیلقین یانداشلار یئتمیش مین نفرلیک یادیگار ایستادیومونو دولدوروب، "1 آذربایجان"، "آذربایجان وار اولسون، ایستهمهین کور اولسون"، "تورکلرین ایفتیخاری، تراختور-تراختور" و باشقا شوعارلار سسلندیریردیلر. هابئله تیملری قول یئدیکده، "عیبی یوخ" دئیه باغیریردیلار. اصلینده اونلار بئله جه، ریضاشاهدان بری تورکلری کوچمه سه ییب آسیمله ائتمه یه چالیشانلارا گور جاواب وئریردیلر.

او دؤنوش فصلی قورتولاندا، تراختور سون سیرالامادا 7 -ینجی چیخسادا، اؤلکه نین بوتون مئدییالاریندان تبلیغ اولونان پئرسپولیسله ایستیقلال تیملرینی گئریده بوراخیب، ایلین ان چوخ تاماشاچیسی اولان تاخیمی اولدو. طبیعی اولاراق، بئله بیر ایلین عرضینده تراختور قونوسوندا بول-بول ایلگینج اولایلاردا باش وئریردی. ماراقلی اولایلارین بیری، تیلویزیونون "نود" آدلی برنامه سینین تیملر آراسی گئچریلن دارتیشمالی اس ام اس یاریشی ایدی. یاریش زامانیندا چوخلارینا بللی اولموشدو کی، بو یاندان تراختورا رای گؤندرنده ندنسه او یاندا نوده گئدیب چاتماییر!؟؟ و نودین سون سونوجو گئجه یاریسی ایرانا گؤستریردی کی، پئرسپولیسین یوزده 51، ایستیقلالین یوزده 33 و تراختورون یوزده 11 اؤلکه ده طرفداری وار!

هر نه ایسه، او ایل باشا چاتیب، 90-1389فصلینین برنامه سی یایینلاندی. تراختورون اوول هفته ده کی یاریشی 1389/5/5 تاریخینده ناهاردان سونرا تهرانین پئرسپولیس تیم ایله گئچیریله جک ایدی. من ایسه، ایلک دفعه اولاراق تبریزدن دیشاریدا تراختورو آلقیشلاماق ایسته ییب تهرانا گئتمه یه قرار وئردیم. تراختورو دستکلمک اوچون، چئشیدلی تورک یوردلاریندان تهرانا آخین ائدیب، یوز مین نفرلیک "آزادی" ایستادیومونا دوغرو گلمیشدیلر. اویون باشلایاندا، بیر طرفده 30-20 مین چیلقین یانداش دایانمادان تراختورو گور آلقیش ائدیردیلر. قارشی طرفده ایسه، ساییلاری بلکه ده تراختورچولاردان چوخ اولان پئرسپولیسچیلر، قوناق تیمین تاماشاچیلارینا چاش-باش قالیب سوسموشدولار. بو دوروم حاکیم اولا-اولا، تراختور یاریشی ائله یاخشی اوینایانماییب، بیر قول یئییب اودوزدو. آنجاق، بیرلشمیش تورکلر اؤزلرینه آرتیقراق گوونیب، ظفرلرین لاپ یاخین اولدوغونو حیسس ائتدیلر.

سونرالار خبر تاپدیم، "فوتبالیست ها" درگیسی 25 -ینجی ساییسیندا بیز گئتدیییمیز یاریشدان گؤتوردویو بیر عکسی اوول صفحه سینده چاپ ائدیبدیر. من ایسه، "یاشاسین تراختور" بایراغی الیمده اولاراق ساغ طرفده دورموشام.