مشدی هاشم رنجبر اصل ایله دانیشیق

مشدی هاشم رنجبر اصل ایله دانیشیق

تاریخ: 14/5/1395

ساعات: 13-11

یئر: مشدی هاشمین ائوی(شیرامین)

دانیشیغی آپاران: قدرت ابوالحسنی سهلان

باشلانیش: ایللر اؤنجه، آتا-بابامیزین (روستملی ایله ستارلی طایفالارینین موشترک جددی حئسابلانان و منیم آلتینجی بابام اولان "آغاکیشی" نین) آذرشهرین شیرامین کندیندن ساوالانا گلمه سینی، "حاجی زولفعلی پیر سهلان" دان ائشیتمیشدیم. حاجی زولفعلی اؤزوده ائشیتمیشدی کی، شیرامینلیلردن نئچه سی آتا-بابامیزی قایتارماق اوچون ساوالانا گلمیش ایمیشلر. آمما بونلار قبول ائتمه ییب دئمیشدیلر، داها بیز بورادا یورد سالمیشیق و قاییدانماریق. بیرده، حاجی زولفعلی وورغولایاردی کی، بیزیم آتا-بابالاریمیز شیرامینده "خان" اولموشدولار! حاجی زولفعلیدن باشقا، او بیری طایفاداشلاریمیزداندا شیرامیندن گلمه اولدوغوموزو ائشیتدیم. 75 یاشی اولان "حسین دولتخواه سهلان" دئییردی: "دده م دئیردی، باغیر بابا دئیردی، بیز شیرامینین حاج آلله قولو طایفاسیندانیق." (باغیر منیمده دؤردونجو جددیم اولور)

من، آغاکیشی ایله حاج آلله قولو طایفاسینا گؤره یاخیندان معلوماتلار توپلاییم دئیه، جوما آخشامی گونو (14/5/1395) سحر باشی ماشینیمی ایشله دیب یاشادیغیم تبریزدن شیرامین کندینه ساری یولا دوشدوم.

بیر ساعات یاریم سونرا شیرامینه چاتیب ایلک دفعه اولاراق او کندی گؤردوم. کندین اووللرینده اصلی خییاوانین قیراغیندا آرابانی ساخلاییب یئره دوشدوم. گئچیب بیر یئره ییغیشمیش نئچه نفر جوان-قوجایا دوغرو یئریدیم. شجره میزی اونلارا گؤستره رک آماجیمی سؤیله دیم. آردیندان، شیرامیندن، طایفالاریندان و گئچمیشندن سورغولار سوروشدوم. دئدیلر، شیرامینین اوچ طایفاسی وار: خان احمدلی، شامحمدلی و مرندلی. ائشیتدیم، او کندده، اوجا داغ، ایلانلی داغ، ساری داغ و کؤتوک داغ وار. سولو دره، سئلاب دره سی و آل-وئردی دره سی واردی. هابئله، کره مینلی و قیرمیز قاپلار آدیندا بؤلگه آدی وار. پیرچوبان یولویلا بازار یولو(آذرشهره گئدن یولا دئییرلر) وار. سؤیله دیلر، شیرامین کؤوشنی اورمو گؤلونه جن اوزانیر و داشکسن، خه نه یه(خانقاه)، سئلاب، آلوانا(آلوانق) و پیرچوبان اورانین قونشو کندلریدی. هر حالدا، "آغاکیشی" و "حاج آلله قولو طایفاسیندان" اوراداکیلارین هئچ بیری بیر ذات ائشیتمه میشدیلر. اونلار دئییردیلر، شیرامینده قدیم "آلله وئردی خان" آدلی بیر مشهور کیشی وار ایمیش.

بیر موددت سونرا بیر نفر یئتیشیب منه دئدی، گلین سیزی یوزدن چوخ یاشی اولان بیر کیشینین یانینا آپاریم. ائله جه، مشدی هاشیمین ائوینه دوغرو یوللاندیق.

بئله لیکله، منه یاردیم ائدن بوتون شیرامینلیلردن چوخ-چوخ تشککور ائدیب، مشدی هاشیملا اولان دانیشیغیمی سونورام.